»  کورتەچیرۆک

گیا لەسەر پنجی خۆی دەڕوێتەوە

ماموستا یاسین احمد - وه‌رگێری ماڵپه‌ر
لە دێر زەمان و لەیەکێک لە ناوچە دوورەکانی شار .. 
پیاوێک ھاوسەرگیری کرد و لەدوای یەکەم رۆژی ھاوسەرگیری لەگەڵ دایکی و خێزانەکەی لەسەر خوان دانیشتن .. 
پیاوەکە خواردنێکی زۆری بۆ خێزانەکەی دانا و بڕێکی زۆر کەمی لە پێش دایکی دانا ..!! 
پیاوەکەی پێی وابوو کارێکی باشی کردووە و رێزی لە خێزانەکەی ناوە بەم کارە ناڕێکەی . 
خێزانەکەی ھەستی بەم شتە کرد و لەبەر ئەوەی خانەدان بوو راستەوخۆ رووی لە پیاوەکە کرد .. 
بە پیاوەکەی گووت : دەبێت ئێستا تەڵاقم بدەیت ...!!!! 
پیاوەکە سەری سوڕما لە داواکاریی خێزانەکەی و پێی گووت : پێم بڵێ لەبەر چی داوای تەڵاق دەکەیت ؟. 
ئافرەتەکە گووتی : گیا لەسەر پنجی خۆی دەڕوێتەوە .. 
تۆ لەبەر خاتری من سوکایەتیت بەدایکت کرد و رۆژێک دادێت ئەو منداڵانەی لە تۆ دەبن ، لەبەر خاتری ھاوژینەکانیان سوکایەتی بە من دەکەن .. 
دواتر ئافرەتەکە لەم پیاوە جیا بووە .. 
جارێکی دیکە ھاوسەرگیری کردەوە و شووی بە پیاوێکی بەڕێز و خانەدان کرد .
دوای چەندین ساڵ چەندین منداڵی بوو ... 
رۆژێکیان کاتێک گەشتی دەکرد بۆ شارێکی دیکە .. 
کوڕەکانی شوێنێکی باشیان لەسەر پشتی وشتر بۆ رێکخستبوو و لەرێگادا زۆر گرنگیان بە ئارامی دایکیان دەدا .. 
لەرێگای گەشتەکەیان تووشی کاروانێکی دیکە بوون کە پیاوێکی پیری بە تەمەن لە دواوەی کاروانەکە دەڕۆیشت و شەکەت و ماندوو بوو .. 
پیاوەکە پێخواس و ماندوو دیار بوو و کەس گرنگی پێنەدەدا ..!! 
ئافرەتەکە بە کوڕەکانی گووت : ئەم پیاوەم بۆ بانگ بکەن .. 
کاتێک پیاوەکە ھات ، ئافرەتەکە گووتی : نامناسیتەوە .. ؟ 
پیاوەکە گووتی : نەخێر تۆ کێیت ؟ 
ئافرەتەکە گووتی : من ھاوسەری پێشووتم .. 
پێم نەگووتی گیا لەسەر پنجی خۆی دەروێتەوە ... 
سەیری منداڵەکانی من بکە چۆن گرنگیم پێدەدەن و خزمەتم دەکەن و سەیری حاڵی خۆت بکە .. 
کوا منداڵەکانت لە کوێن ؟ 
پیاوەکە سەری داگرت و بێ دەنگ بوو .. 
ئافرەتەکە گووتی : ئەمە سزای ئەوەیە کە رێزت لە دایکت نەگرت و ئامادەبووی سوکایەتی پێبکەیت .. 
ئینجا رووی لە کوڕەکانی کرد و گووتی : لەبەر خاتری خودا یارمەتی بدەن  ئاگاداری بن تا دەگەینە شوێنی مەبە ست ..
برایان وخوشکان .. 
ئەم ژیانە قەرز و قەرز دانەوەیە و چ بچینی ھەر ئەو دەدوریتەوە .. 



177بینین‌‌‌
8 مانگ پێشتر - Apr 2 2021 1:25PM