١.قسە لەگەڵ منداڵەکەت بکە :
لە ھەموو بابەتەکانی ژیان قسەی لەگەڵ بکە و گوێی لێ رابگرە و گفتوگۆی بونیات نەرانەی لەگەڵ بکە ، بەشێوەیەک کە لەگەڵ تەمەنی بگونجێت ، ئەمە وادەکات متمانەی زیاتری بە خۆی ھەبێت و وا دەکات زمانی پاراوتر بێت لە قسەکردن و دەربڕینی بابەتەکان و لایەنی ھزریان بەھێزتر دەکات .
٢.وەڵامی پرسیارەکان بدەوە :
منداڵ بە شێوەیەک گشتی زۆر پرسیار دەکەن بە تایبەتی ئەو شتانەی کە نامۆیە بە لایانەوە ، لەبەر ئەمە لەسەر دایکان و باوکان پێویستە بەپێی توانا و تێگەیشتنی منداڵەکە وەڵامی پرسیارەکان بدەنەوە ، چونکە ئەمە یارمەتی دەدات لە تەمەنێکی بچووکەوە بە دوای وەڵامی شتەکان بگەڕێت و زانیاری زیاتر بێت .
٣. منداڵەکەت ھانبدە :
ئەگەر منداڵەکەت کارێکی باشی کرد ھانی بدە بەردەوام بێت لەسەر ئەم جۆرە کارانە ، چونکە ئەمە دەبێتە سەرەتایەک بۆ کاری باشتر و رەفتاری گونجاوتر .
٤. کورتە چیرۆکی بۆ بخوێنەوە :
یەکێکە لەو رێگایانەی یارمەتی دایک و باوکان دەدات گەشە بە بەھرەی منداڵەکەیان بدەن ، خوێندنەوەی چیرۆکە و سەرسام بوونە بە کەسایەتیە باشەکانی نێو چیرۆکەکان ، ئەم جۆرە چیرۆکانە چالاکی بە ھزری منداڵەکە دەدات بۆ ئەوەی بە دوای زانیاری زیاتر بگەڕێت و زیرەکتری دەکات .
٥. لێ مەگەڕێ ئالۆدەی بەرنامەکانی تەلەفزیۆن بێت :
لەوانەیە بەشێک لە بەرنامەکانی تەلەفزیۆن شتی باش و تەندروست بن ، بەڵام بەشێوەیەکی گشتی نابێت منداڵ بەردەوام سەرنجی لەسەر تەلەفزیۆن بێت ، چونکە کاریگەری خراپی لەسەر ئاستی بیرکردنەوەی دەبێت ، بەتایبەت ھەندێک بەرنامە کە لەوانەیە لەگەڵ ئاستی تێگەیشتنی ئەو نەگونجێت .
٦. یاری لەگەڵ منداڵەکەت بکە :
یاریکردن لەگەڵ منداڵ باشترین کاریگەری لەسەر کەسایەتی منداڵ ھەیە بەتایبەتی ئەو یارییانە بە یاری زیرەک ناسراون کە وا لەمنداڵ دەکات زیاتر بیر بکاتەوە و کاتێک تۆ یاری لەگەڵ دەکەیت منداڵەکە زیاتر چێژ وەردەگرێت .
سەرچاوە | پێگەی نبراس