یەکێک لە گرنگترین ئەو کارانەی کە پێویستە شوفێران ئەنجامی بدەن بریتیە لە گۆڕینی روونی ئۆتۆمبێلەکانیان و نابێت بەھیچ شێوەیەک ئەم بابەتە پەراوێز بخەن بۆ ئەوەی پارێزگاری لە تەمەنی بزوێنەرەکەیان بکەن.
روون گۆڕین، بریتیە لە گۆڕینی روونی کۆن و گۆرینی بە روونی نوێ و ھەروەھا وا باشترە لەگەڵ ئەم کارەش فلتەری روونەکە بگۆڕیت.
چەند ھۆکارێک ھەن کە کاریگەریان ھەیە لەسەر کاتی گۆڕینی روونی ئۆتۆمبێل لەوانەش بارودۆخی کەش و ھەوا، چۆنیەتی لێخوڕینی ئۆتۆمبێل، ئەو خێرایەی لەسەری دەڕۆیت، تەمەنی بزوێنەرەکە و ھەندێک ھۆکاری دیکە .
ھەندێک لە نامیلکەکان تایبەت بە ئۆتۆمبێل، رێنمایی شوفێران دەکەن کە دوای ٤ھەزار کم روونی ئۆتۆمبێلەکانیان بگۆڕن و ھەندێکیان دەڵێن دوای ١٦ ھەزار کم .
لەلایەکی دیکەش ھەندێک نامیلکە باس لەوە دەکەن کە لەوەرزی زستانان پێویستە دوای ٦ ھەزار کم روونی ئۆتۆمبێل بگۆڕیت و لەوەرزی ھاوین لە نێوان (٣ - ٥)ھەزار کم .
لەھەموو حاڵەتەکان بارودۆخەکە بەندە بە شوفێر و ئۆتۆمبێلەکە و تا دەکرێت پێش وادەی گۆڕینی خۆی روونی ئۆتۆمبێلەکەت و فلتەرەکەی بگۆڕیت.
ھەروەھا لەم حاڵەتانەی خوارەوەش پێویستە روونی بزووێنەرەکەت زووتر بگۆڕیت :
١.ئەگەر ئۆتۆمبێلت بە خێرایی لێدەخوڕی.
٢. ئەگەر کەشوھەوا زۆر سارد بوو یا زۆر گەرم بوو .
٣. ئەگەر رێگەکە قیرتاونەکراو بوو.
٤. ئەگەر بزوێنەری ئۆتۆمبێلەکەت کۆن بوو و روونی زۆر سەرف دەکرد.
٥. ئەگەر ئۆتۆمبێلەکەت باری قورسی لێ بار دەکرا.